【攞重物時感覺手臂要「甩」出黎？可以點樣透過訓練改善？】

有無試過去完購物之後，攞住戰利品返屋企嘅時候，感覺兩邊手攞重量嘅感覺明顯不一樣。

一邊手感覺好穩定咁「掛」係身體上面，而另一隻手就好似就快被重量拉到「甩」出黎。

究竟點解會有咁樣嘅分野，又應該點樣改善？

肩胛骨的穩定性

肩胛骨同肋骨一起合成肩胛胸壁關節，但呢個關節同其他關節最大的不同之處，在於並沒有透過韌帶連結去增加穩定性，而只能透過肌肉的張力來穩定。

咁樣嘅設計能夠最大限度增加肩胛骨嘅活動能力，增加上肢嘅發力效率，但同時亦都容易導致肩胛骨不穩定的情況發生。

人體本身的肩胛骨關節窩是呈向上的角度，連結肱骨頭。

當手臂負重的時候，力量會傾向把肱骨頭往下拉，繼而將整個肩胛骨往下壓以及往下轉。

因此，本身負責上旋及上升的肌肉，即係斜方肌、菱型肌、前鋸肌，就需要出力去維持肩胛骨穩定。

呢個功能可以稱為「抗下旋能力」。

當呢個功能失效的時候，就會有肩胛骨被「拉」到甩出黎的感覺了。

好多人會以為，負重能力唔得就直接係健身房練負重農夫走路就可以了。

但你本身無肩胛骨的「抗下旋能力」，直接係健身房攞住重量去走路，係唔會突然間出現抗下旋能力的，情況只會越練越差。

訓練順序應該係先訓練肩胛骨的穩定性，確保肩胛骨有一定能力的上下旋控制能力。

特別係從上旋到下旋時的離心控制，會係比較多人忽略的訓練細節。

當你能夠做到肩胛骨的上下旋控制，肌肉有一定的穩定能力之後，再去透過農夫走路訓練肌肉係「抗下旋」狀態下的肌肉耐力，就會更為合理了。

希望呢篇文章能夠幫助大家的肩胛骨更為穩定，從此購物之後能夠將更多戰利品搬返屋企！