肩胛骨活動唔好，係咪一定係肩膊問題？
上肢活動與肩頸痠痛的常見誤解
一講到上肢活動唔好，肩頸痠痛，好多人第一時間會諗，係咪上斜方肌太緊？前鋸肌唔夠力？定係下斜方肌唔識發力？
跟住就開始放鬆、拉筋、按摩、或者進行前鉅肌訓練。
以上方法唔會完全無用，但練開嘅朋友應該都試過，練完一輪，肩胛骨活動的確好返，但過一排可能又打回原形。
問題可能唔係漏咗練邊個位置，而係忽略咗另一件事——每日發生兩萬次左右嘅動作—呼吸。
呼吸對肩胛骨活動的影響
平時安靜呼吸的時候，呼吸動作主要依靠腹腔與胸腔的共同活動。
橫膈膜向下降，增加胸腔上下嘅空間。同一時間，肋骨都會向唔同方向活動，增加胸腔前後同左右嘅容積。
但假如主要嘅呼吸機制做唔到足夠嘅工作，身體依然要呼吸——佢唔會因為你呼吸模式差，就自動決定少吸啲氧氣。
當橫膈膜同下方胸廓提供唔到足夠嘅擴張空間，身體就會叫其他肌肉加入，試下從上方拉高胸廓，增加吸氣空間。
呢個就係我地經常見到嘅胸式和頸式呼吸。
簡單黎講：
下面開唔到，就唯有向上拉。
呼吸相關肌肉的負擔與肩胛骨活動
當呼吸需求增加，胸鎖乳突肌（SCM）、斜角肌（Scalenes）、胸小肌（Pectoralis Minor）呢啲肌肉，都會加大參與，幫手提升胸骨、鎖骨或者上方肋骨。
以上肌肉都有自己本身的主要工作，用來活動頭部、頸椎、以及肩胛骨。
但當突然被徵召去協助進行呼吸時，由於工作量大，就好容易會出現緊繃、張力過高的情況。
以胸小肌為例。
胸小肌由第三至第五肋骨附近連接到肩胛骨嘅喙突。
當胸廓固定時，胸小肌可以協助肩胛骨進行前傾的動作。
但必要時，都可以透過提升肋骨幫手吸氣，但代價是肩胛骨變成固定的位置，亦因此帶來肩胛骨活動不良的後果。
上斜方肌都有類似問題。
當我地抬高手臂，上斜方肌需要配合下斜方肌、前鋸肌等肌肉，共同控制肩胛骨上旋、後傾以及鎖骨的動作。
但如果一個人平時每一次呼吸，都習慣用肩頸肌肉將成個上胸拉起，以上肌肉本身已經長期承擔額外工作。
當肩頸肌肉需要承擔更多的呼吸工作，肌肉工作優先順序改變，肩胛骨的活動策略以及肌肉張力都自然會受影響。
所以除左表示「上斜方肌太緊」之外，可以更進一步思考：為甚麼這些肌肉需要一直用力？
減少呼吸對肌肉的負擔
見到一塊肌肉張力高，我地好自然就會想放鬆佢。
見到上斜方肌好緊，就按摩上斜方肌；見到胸小肌好緊，就拉胸小肌。
但如果呢啲肌肉一直維持較高工作量，係因為佢地每日都要協助完成呼吸，單純放鬆肌肉，未必真正改變佢需要工作嘅原因。
就好似一個員工每日要同時做兩個人嘅工作。
你可以叫佢休息一下，但只要工作分配無改變，佢好快又會重新變得忙碌。
所以，比起單純放鬆過緊的肌肉，減低肌肉的工作量，令到他們不用協助呼吸，會是更好的方法。
常見問題
肩胛骨活動不良一定是肩膊問題嗎？
不一定，呼吸模式不良也可能是肩胛骨活動不良的原因，因為不正確的呼吸會增加肩頸肌肉的負擔。
如何改善肩頸痠痛？
除了放鬆肌肉，調整呼吸模式以減少肩頸肌肉的負擔是更有效的方法。
哪些肌肉在呼吸中容易過度使用？
胸鎖乳突肌、斜角肌和胸小肌在不正確的呼吸模式中容易被過度使用，導致肌肉緊繃。
留言